Монгол улсын номын сангийн салбар 2014 онд анх удаа “Номын сангийн тухай хууль”-тай болж, үйл ажиллагаандаа дагаж мөрддөг болсон. Техник, технологийн болон нийгмийн хурдацтай хөгжлийг дагаад номын сангийн салбарын үйл ажиллагаанд олон өөрчлөлт гарч байна. Тиймээс 2014 онд батлагдсан номын сангийн тухай хуульд нэмэлт өөрчлөлт оруулах, сайжруулах хэрэгцээ шаардлага үүсээд байна.
Энэхүү цаг үеийн байдалтай уялдаад Номын сангийн тухай хуульд нэмэлт өөрчлөлт оруулах санаачилгыг УИХ-ын гишүүн Ч.Ундрам, Б.Саранчимэг нар гаргаж Үндэсний номын баярын өдөр болох 2022.05.20-нд МУИС-ийн Номын сан Соёлын яамтай хамтран “НОМЫН САНГИЙН ТУХАЙ ХУУЛЬ”-ийн хэлэлцүүлгийг зохион байгуулж байна.
Тус үйл ажиллагаанд УИХ-ын гишүүн Ч.Ундрам, Б.Саранчимэг, Соёлын яам, Мэргэжлийн хяналтын газар болон бусад ТББ, ном хэвлэн нийтлэгчид, номын сангийн салбарын төлөөлөл болох 120 гаруй зочид төлөөлөгчид оролцож байна.
Энэ үеэр хуулийн хэлэлцүүлгээс гадна номын сангийн салбарт тулгамдсан асуудлуудыг хөндсөн илтгэлүүд тавигдаж, хуулийн хэлэлцүүлэг өрнүүлж, нэгдсэн санал, дүгнэлт гарган ажиллаж байна.
